وزیراعظم عمران خان کا دورہ روس بہت اہمیت کا حامل ہے، چینی ماہرین
بیجنگ (انٹرنیشنل ڈیسک)
چین کی ساؤتھ ویسٹ یونیورسٹی آف پولیٹیکل سائنس اینڈ لاء کے وزٹنگ پروفیسر اور چہار انسٹی ٹیوٹ کے سینئر فیلو چینگ ژی ژونگ نے کہا ہے کہ وزیر اعظم عمران خان کا روس کا آئندہ سرکاری دورہ تاریخی اور بڑی اہمیت کا حامل ہے۔ ان کا کہنا تھا کہ یہ بات خاص طور پر قابل ذکر ہے کہ 23 سال کے بعد روس نے پاکستانی رہنما کو ماسکو کے دورے کی دعوت دی ہے جو کہ وزیراعظم عمران خان کے بلند قد اور قائدانہ خصوصیات کی عکاسی کرتا ہے۔
پروفیسر چینگ نے ایک بیان میں کہا کہ روسی صدر ولادی میر پوتن وزیراعظم خان کا بہت احترام کرتے ہیں اور اب پاکستانی لیڈر کی آواز کو ہمیشہ عالمی سطح پر تسلیم کیا جاتا ہے چاہے وہ علاقائی ہو یا بین الاقوامی مسائل، جس سے پاکستانی عوام اور قوم کا وقار بلند ہوتا ہے۔ اپنے تجزیے میں انہوں نے کہا اس دورے کی اہمیت بنیادی طور پر تین پہلوؤں سے ظاہر ہوتی ہے: پاکستان کی بین الاقوامی حیثیت میں اضافہ؛ روس کا پاکستان کے ساتھ تعاون کو فروغ دینے کی طرف جھکاؤ کیونکہ بھارت امریکہ کے قریب ہوتا جا رہا ہے۔ اس کے علاوہ یہ دورہ پاکستان، چین اور روس کے درمیان تعاون پر مبنی تعلقات بیرونی طاقت کے خلفشار کو روکنے کے لیے سازگار ہیں۔
انہوں نے وضاحت کرتے ہوئے بتایا کہ پاکستان کی بین الاقوامی حیثیت میں نمایاں اضافہ ہوا ہے اور وزیراعظم خان کی قائدانہ صلاحیتوں کو عالمی برادری نے بہت زیادہ تسلیم کیا ہے۔ یہ ہی وجہ ہے کہ حالیہ برسوں میں پاکستان کی سفارت کاری جیو اکنامک حکمت عملی پر توجہ مرکوز کرتے ہوئے، دنیا کی بڑی طاقتوں کے درمیان متوازن تعلقات کے عزم کے ساتھ بہت ’مضبوط اور کامیاب‘ رہی ہے۔