امریکہ نے برطانیہ میں جوہری ہتھیار نصب کیے تومناسب جواب دیں گے، روس
ماسکو (صداۓ روس)
جنیوا میں اقوام متحدہ کے دفتر اور دیگر بین الاقوامی تنظیموں میں روس کے مستقل نمائندے گیناڈی گیتیلوف نے کہا کہ روس برطانیہ کی سرزمین پر امریکی جوہری ہتھیاروں کی ممکنہ تعیناتی سے متعلق صورتحال پر نظر رکھے ہوئے ہے اور اگر ایسا ہوا تو وہ اس کے مطابق جواب دے گا۔ گیناڈی گیتیلوف نے کہا ہم ان رپورٹس پر نظر رکھے ہوئے ہیں جو ممکنہ طور پر برطانیہ میں امریکی جوہری ہتھیاروں کے ساتھ ایک ایئربیس کو دوبارہ شروع کرنے کے بارے میں ہیں۔ ان کا کہنا تھا کہ اس وقت امریکہ کی جانب سے مشرقی یورپ کے ممالک بالٹک اور پولینڈ کو جوہری ہتھیار بھیجنے کے بارے میں قیاس آرائیاں کی جاتی رہی ہیں۔ روسی عہدیدار نے واضح کیا کہ ایسے اقدامات تناؤ کو جنم دیتے ہیں، ہم صورت حال کا بغور جائزہ لے رہے ہیں اور اگر یہ سچ ہے تو روس اس کے مطابق جواب دینے پر مجبور ہو جائے گا.
انہوں نے اس حقیقت کی طرف بھی توجہ مبذول کروائی کہ مغربی ممالک تخفیف اسلحہ کی کانفرنس کے اجلاسوں میں اس مسئلے کو نہیں اٹھائیں گے لیکن روس اپنے تبصروں اور بیانات میں ہمیشہ اس بات کو ذہن میں رکھے گا کہ اس طرح کی ممکنہ پیشرفت کشیدگی کو جنم دیتی ہے اور کسی بھی طرح سے اس کشیدگی میں کمی لانے کے لئے کوئی کردار ادا نہیں کرے گی۔